МАН-ын бага хурлын VIII хуралдаан үргэлжилж байна. Бага хурлаар Монгол Улсын Ерөнхийлөгчийн 2017 оны сонгуульд нэр дэвшүүлэх асуудал, нэр дэвшигчийн дэвшүүлэн орох мөрийн хөтөлбөрийг хэлэлцэх юм.
Ингээд Монгол Улсын Ерөнхийлөгчийн 2017 оны сонгуульд нэр дэвшүүлэх асуудлыг эхлэн хэлэлцэв. Хуралдаанаар намын Удирдах зөвлөлөөс Ерөнхийлөгчийн сонгуульд нэр дэвших эрхээ авсан УИХ-ын дарга, МАН-ын дарга М.Энхболд, УИХ-ын дэд дарга Ц.Нямдорж хоёрт санал хурааж явагдаж өндөрлөлөө. Нууц санал хураалтаар бага хурлын 259 гишүүний 222 нь буюу 85.7 хувь нь М.Энхболдод, 47 нь буюу 14.2 хувь нь Ц.Нямдоржид саналаа өгчээ. Тооллогын комиссынхон дүнг танилцуулсны дараагаар МАН-аас Ерөнхийлөгчийн сонгуульд нэр дэвшихээр гишүүдийн олонхийн санал авсан МАН-ын дарга М.Энхболд үг хэлсэн юм . Тэрбээр:
-Та бүхэндээ чин сэтгэлийн угаас гүн талархал илэрхийлж байгааг минь хүлээж авна уу. Эрэлхэг зоригт өвөг дээдсийн минь үүсгэн байгуулсан МАН-ынхаа дэврэн намирах туганд Монголын төлөө гэсэн нэгэн үзүүрт сэтгэлээр гар гараасаа барилцан тэмцэж яваа намынхаа мянга мянган гишүүдийн гэгээн өлмийд гүнээ хүндэтгэл үзүүлж байгааг минь хүлээж авна уу. Монгол Улсын Ерөнхийлөгчийн сонгууль намайг дэвшүүлсэн энэ үйл явдлыг би асар их итгэл, өндөр их хариуцлага гэж гүнээ ухамсарлан хүлээн авч байна.
Үүрэг даалгаврын асар том ачаа мөрөн дээр бууж ирж байна гэдгийг тодоос тод мэдэрч байна. Би МАН хэмээх өндөр босготой, өлзийт хоймортой их айлд энэрэл түшгийн уул мэт өнөр бүлийн дунд өсөж, өндийж өдий зэрэгт хүрсэн. Төрийн байгууллагын жирийн албан хаагчаас их хотын захирагч, Монгол Улсын Засгийн газрын тэргүүн, хууль тогтоох дээд байгууллагад парламентын спикер хүртэлх миний амьдралын 30 гаруй жилийн өгсүүр замын улаач нь та нар минь, намын мянга мянган нөхдүүд минь байсан. 96 жилийн бахархалт түүхтэй, улс үндэстний тусгаар тогтнол, сэргэн мандалт, хөгжил дэвшлийн манлайлал, зүтгэх зүтгүүр нь болсоор ирсэн энэ том намыг удирдах хувь заяа надад хоёронтаа тохиолдсон. Өөр байгаа чадлын хэрээр, хоёргүй сэтгэлээр, хичээл зүтгэлээр өнөөдрийг хүрсэн. Энэ хугацаанд хүрсэн үр дүн, амжилт бүхэн та бидний хамтын бүтээл байсан хэмээлээ.
Н.Энх