МАН-ын Ерөнхий нарийн бичгийн дарга Д.Амарбаясгалан цаг үеийн асуудлаар мэдээлэл хийлээ. Тэрбээр:

-Сонгуультай холбоотойгоор нэг хүн хоёр иргэний үнэмлэхтэй байна хэмээн АН-аас нэр бүхий хүмүүс өөрсдийн нийгмийн сүлжээгээр мэдээлсэн. Энэ нь сонгуулийн үйл ажиллагааг зориудаар будилаантуулж байна. Иргэд сонгогчдын саналыг нууцлах зорилгоор СЕХ хавтастайгаар саналын хуудсыг иргэд, сонгогчдод өгч байгаа юм байна.

Саналын хуудсыг хавтастай хамт хийж болохгүй. Зарим хэсгийн хороодод хавтастай автомат машиныг уншуулж гацаасан тохиолдолд гарчээ. Тиймээс  нэр дэвшигчдийн нэрсийг дугуйлах хэсгээр хавтасыг нугалсан байна. Үүнийг АН-ын гишүүн Ц.Оюунгэрэл “төрийн албан хаагчдаа хэнд санал өгч байгааг нь мэдэх зорилготой зориудаар нугалжээ” гэж сонгуулийг бусниулах мэдээллийг цахимаар явуулж байна.

Хурууны тэмдэглэгээ тавих талаар АН-аас хүсэлт гаргасны дагуу СЕХ нийслэлд сонгогчдод хурууны тэмдэглэгээ хийж байгаа. Гэтэл АН-ынхан хурууны хээ угаахаар арилж байна гэсэн худлаа мэдээлэл АН хийж байна.  Сонгуулийн үйл ажиллагаатай холбоотой гүтгэлэг АН явуулж байна. Сонгуультай холбоотой мөнгө тараах гэж байгаад хуулийн байгууллагынханд баригдсан үйлдэл АН-аас гарсан. Мөн Баян-Өлгий аймгийн ШТС-ын өмнө шатахууны талон талаар үйлдэл гарсныг манай намын зүгээс хуулийн байгууллагад мэдээлж зогсоосон.

АН сонгуульд амжилтгүй оролцох  нөхцөл нь бүрдсэн учир сонгуулийг зориудаар будилаантуулах, хүчингүй болгох чиглэлд тодорхой үйлдэл хийж магадгүй байдал үүсчээ  гэж бидний зүгээс үзэж байна хэмээлээ.

ЗГХЭГ-ын дарга Ж.Мөнхбат “АН-ын сонгуулийн штаб, менежерүүд иргэдийг буруу зүйлд уруу татаж, будлиантуулах гэсэн мэдээлэл их цацаж байна. Иргэдийн саналыг худалдаж авах гэж байсан үйлдлүүд цагдаагийн байгууллагад шалгагдаж байна. Санал худалдаж авах, нийгмийг эмх замбараагүй байдалд уруу татах асуудлыг АН-ын зүгээс зохион байгуулалтай хийж байна” гэсэн юм. 

Н.Энх