Засгийн газрын ээлжит хуралдаан боллоо. Хуралдаанаар хэлэлцэн шийдвэрлэсэн асуудлаар ЗГХЭГ-ын дарга Г.Занданшатар мэдээлэл хийлээ. Тэрбээр:

-Засгийн газар 2019 оныг "Эх оронч худалдан авалтын жил" болгон ажил өрнүүлэхээр шийдвэрлэлээ. Учир нь үндэсний үйлдвэрлэл хөгжиж байж ажилгүйдэл арилна. Өнгөрсөн онд 1.3 их наяд төгрөгийн бараа үйлчилгээ худалдан авснаас 4 хувь буюу 47,1 тэрбум төгрөгийн худалдан авалтыг дотоодын үйлдвэрлэлээс худалдан авчээ.

Төрийн төдийгүй нийт  байгууллага, иргэддээ Эх оронч худалдан авалт хийхийг уриалж байна.

Байгаль орчин, цаг уурын нөхцөлдөө дасан зохицсон үндэсний үйлдвэрлэгчдийн бүтээгдэхүүнээ худалдан авахыг уриалж байна.

Аж үйлдвэрийн үндэсний зөвлөлийг Ерөнхий сайдын санаачлагаар байгуулагдсан. Өнөөдөр монгол хонины ноосоор даавуу хийсэн. Монголдоо үйлдвэрлэсэн пиджакийг би өмсөж байна. Дүрэмт хувцсыг монголдоо үйлдвэрлэсэн даавуугаар хийж байна. Ингээд үндэсний үйлдвэрлэгчдийн саналыг Засгийн газар дэмжлээ.

Ноос ноолуур, машин механизм, хөдөө аж ахуй, газар тариалан үйлдвэрлэгчдийн холбоод ажлын нарийвчилсан төлөвлөгөөгөө гаргасан байгаа. Сар шинийн баяраар үндэсний үйлдвэрлэлээ дэмжихийг уриалж байна хэмээн мэдээлээд сэтгүүлчдийн асуултад хариулав.

-Ерөнхий сайд хотын даргыг хэзээ батламжлах бол?

-Хотын дарга бол Улаанбаатар хотын агаарын бохирдол, автозамын түгжрэл, нийслэлийн иргэдийн өмнө тулгамдсан асуудлыг судлах туршлагатай, намын бүлгийн дэмжлэгийг 100 хувь хүлээж чадахуйц хүн байх ёстой.  Хуулийн дагуу судалж шийдвэрлэнэ.

-Эрдэнэт”-ийн 49 хувь зарагдсан гэх мэдээлэл байгаа. Энэ талаар?

-“Эрдэнэт” үйлдвэр өнөөдрийн байдлаар  УБЕГ-т 100 хувийн Засгийн газрын мэдэлд байгаа. Шүүхийн шийдвэр гарсан ч гэсэн 49 хувийг шилжүүлээгүй, ямар нэг өөрчлөлт ороогүй. “Эрдэнэт”-ийн ТУЗ-д Засгийн газраас томилогдсон төлөөлөл байгаа. Тийм учраас аливаа хувь зарагдсан гэх мэдээлэл байхгүй. Шүүхийн шийдвэрийг хэрэгжүүлэх Шадар сайдаар ахлуулсан ажлын хэсэг ажиллаж байгаа.

Н.Энх