Баянзүрх дүүргийн нутаг дэвсгэр Дүнжингаравын зүүн урд замд өнөөдөр буюу 2019.08.29-ны 03.00 цагийн орчимд "Субару импреза" маркийн автомашин онхолдож хоёр эмэгтэй, нэг эрэгтэй нас барсан ноцтой осол гарсан тухай өмнө нь мэдээлсэн.
Осолд өртөгсөд 18-21 насны залуучууд байжээ. Залуус дөрвүүлээ байсан бөгөөд автомашины моторын хүчээ үзэн уралдаж байсан хоёр автомашины жолоочийн нэг нь замын хажууд зураг дараад зогсож байсан хоёр бүсгүйг дайрч амь насыг нь хохироосон нөхцөл байдал урьдчилсан байдлаар тогтоогджээ. Ослын улмаас гурав залуу газар дээрээ амь насаа алдаж нэг нь амьд үлджээ.
Энэ талаар ТЦА-ны урьдчилан сэргийлэх хэлтсийн дарга, хурандаа Э.Бөхбат "Хэрэг шалгагдаж байгаа учраас мэдээлэл өгөх боломжгүй. Эхний байдлаар амьд үлдсэн залуугийн ярьж буйгаар эргэлт тойруугүй замд хөнгөмсөгөөр найдаж уралдсан байна. Телевиз, кино театруудаар "Галзуу хурд" зэрэг кино цензургүй гардаг. Энэ киног тавилттай, таслал зургийн аргаар хийсэн шүү дээ. Гэтэл бодит байдал дээр кинон дээр гардаг шиг байдаггүй юм. Энэ төрлийн уралдаантай кино залуусын хүмүүжилд муугаар нөлөөлж байна.
Зам дээр уралддаг хүмүүс мэргэжлийн хүмүүс байдаг. Мөн уралдахдаа унаж буй машин бүрэн тоноглогдсон яаж ч уралдсан, магадгүй осолдсон дотор нь сууж яваа хүний амь нас хохирохгүй байдаг. Энэ бүхнийг хангаж байж кино хийгдээд таслал зургийн аргаар харуулдаг болохоос манайхан шиг шөнийн дөрвөн цагт зам дээрээ гараад уралддаг зүйл огт биш. Тусгай зориулалтын зам дээр уралддаг юм. Гэтэл манайхан унаж байгаа машинаараа л уралддаг. Киног үнэмшилгүй дуурайж болохгүй гэж зөвлөмөөр байна.
Найз охиноо суулгаад хэт хурдтай давхидаг. Гэтэл найз охиноо суулгаад цонхоо онгойлгон давхиж байгаад унасан тохиолдол ч бүртгэгдэж байсан.
Өмнө нь бид олон анхааруулсан. Онцгой анхаарахгүй бол цаашид энэ төрлийн гэмт хэрэг үйлдэгдсээр байх эрсдэл өндөр байна. Иргэдээс маш их гомдол ирдэг. Тухайлбал 220 мянгатын замд залуус шөнийн 2.-3 цагийн үед уралдаж, дрифт хийж иргэдийн амгалан байдлыг алдагдуулж өөрсдийнхөө амь насыг золиосолж байна. Залуус замын хөдөлгөөний дүрмээ уншиж судлах, жолооны ур чадвараа дээшлүүлэх хэрэгтэй" гэдгийг анхаарууллаа.
Г.Сүрэн
Уншиж байна |