Оросын Ерөнхийлөгч Владимир Путин есдүгээр сарын хоёрны даваа гаригт Эрхүү мужийг зорино гэж Кремлийн хэвлэлийн алба мэдээллээ.
Эрхүү мужид ажиллах үеэрээ үерийн гамшгийн дараах сэргээн босгох ажлын явцтай танилцан, үерийн улмаас хохирсон иргэдийг орон сууцаар хангах асуудлаар зөвлөгөөн явуулах юм байна.
Түүнчлэн хичээлийн шинэ жилийн эхний өдөр Тулун хот дахь дунд боловсролын сургуульд зочлохоор төлөвлөжээ.
Путин Монгол улс руу албан ёсны айлчлал хийх замдаа Эрхүү мужид саатна гэж Өмнө нь Оросын Ерөнхийлөгчийн туслах Юрий Ушаков мэдээлж байв.
Ийнхүү Эрхүүд саатан ажилласнаар Оросын Ерөнхийлөгч хоёр сарын дотор энэ мужид гурвантаа очиж байгаа тохиолдол юм.
Эргэн сануулахад, энэ зун Эрхүү мужид хоёр ч удаа үерийн гамшиг тохиосон. Эхнийх нь зургаадугаар сарын сүүлээр эхэлсэн бөгөөд тухайн үед үерийн гамшгийн улмаас 25 хүн амиа алдаж, зургаан хүн ор сураггүй болон, 109 суурин, 10 мянган орон сууц усанд автсан юм. Үерийн улмаас Тулун болон Нижнеудинск хотууд илүүтэй хохирч байв.
Дараагийн удаад долоодугаар сарын 27-ны өдөр дахин үерийн гамшиг нүүрлэн, 58 сууринг хамарч, 2000 гаруй орон сууц усанд автсан юм.
Г.Бямбасүрэн
Уншиж байна |