Турк, Сирид болсон газар хөдлөлтийн дараа гурав дахь өдөр нурангин дороос амьд үлдэгсдийг олох магадлал улам багасаж, хоёр улсад амиа алдсан хүний тоо 12 мянгыг давжээ. 

Олон улсын хэвлэлүүдэд мээдэлснээр, амиа алдсан хүний тоо цаг тутамд нэмэгдсээр байгаа бөгөөд хүйтний улиралд нурангин дор амьд мэнд тэсэн үлдэж чадсан хүнийг олох боломж улам л багасаж байгаа аж.

Сүйрэл дагуулсан газар хөдлөлтийн улмаас Туркийн сөрөг хүчин Режеп Тайип Эрдоган болон бусад эрх баригчдыг шүүмжилж, тэднийг байгалийн гамшигийн үед хангалттай шуурхай ажиллаж чадахгүй байгаа, гамшигт бэлэн байгаагүй хэмээн буруутгаж байгаа юм. Харин Эрдоган хохирол амссан бүс нутгуудад ажиллан, нөхцөл байдал хяналтад байгаа хэмээн мэдэгдэж байна.

Гэсэн ч гамшигт нэрвэгдсэн бүс нутгуудад Туркийн Байгалийн гамшиг, онц байдлын хор уршгийг арилгах газрыг шуурхай ажиллахгүй байгаа талаар буруутгасаар байгаа юм. Искандеруны нэгэн оршин суугч ВВС агентлагт ярихдаа, хоёр үеэл дүү нь нурангин дор орчихсон байхад өөрсдөө экскаватор олж ирэн, нурангийг зайлуулах гэхэд албаныхан тэднийг нуранги зайлуулахыг хориглосон хэмээжээ.

"Бид шөнө болтол хүлээсэн ч хэн ч ирээгүй. Тэгээд бид өөрсдийнхөө мөнгөөр экскаватор түрээслэн авч, нуранги зайлуулах гэсэн ч албаныхан биднийг хориглосон. Манай эгчийн хоёр охин болох Айшегюль, Илайда хоёр нурангин дор байсан ч бид аварч чадсангүй" хэмээн эмэгтэй ярьжээ. 

Түүний өгүүлснээр, охид амьд байх ямар ч боломжгүй болсон үед шуурхай албаныхан ирсэн гэнэ. Энэ мэдээллийн дараа Туркийн сөрөг хүчний намын тэргүүн Кемаль Кылычдароглу "Үүнд хэн нэгэн нь буруутай бол тэр нь Эрдоган" хэмээн мэдэгджээ.

Туркийн сөрөг хүчний тэргүүн Кемаль Кылычдароглу Эрдоганы тэргүүлсэн засгийн газар өнөөгийн гамшгийг ерөнхийлөгчийн сонгуульт ажилдаа зориулан пиар болгон ашиглаж байна хэмээн буруутгасан байна. Ирэх тавдугаар сард Туркэд Ерөнхийлөгчийн сонгууль болох бөгөөд Кылычдароглу ч энэ сонгуульд оролцохоор төлөвлөж байгаа аж.

Засгийн газар шуурхай ажиллахгүй байгааг шүүмжлэхийн зэрэгцээ "газар хөдлөлтийн татвар"-тай холбоотой асуудал ч Туркэд шүүмжлэл дагуулж байна.

Энэ татварыг 17 мянган хүн амиа алдсан 1999 оны газар хөдлөлтийн дараагаас авах болжээ. Тэр үеэс хойш 88 тэрбум лир буюу 4,6 тэрбум долларын татвар цугларсан, энэ мөнгө байгалийн гамшгаас сэргийлэх, шуурхай албыг хөгжүүлэхэд зарцуулагдах ёстой байж. Гэвч Засгийн газар энэ мөнгийг хэрхэн зарцуулсан талаар хэзээ ч олонд тайлагнаж байгаагүй, тиймдээ ч эрх баригчид байгалийн гамшигт бэлэн байгаагүй гэж сөрөг хүчнийхэн буруутгаж байгаа аж.

Харин Эрдоган энэ шүүмжлэлд хариу өгч "Ийм сүйрэлд бэлэн байх ямар ч боломжгүй" хэмээн мэдэгджээ.

Одоо тэрбээр гамшиг болсон бүс нутгуудад ажиллаж байгаа бөгөөд нөхцөл байдал хяналтад байгаа хэмээсэн байна. Гамшигт бэлэн байгаагүй гэж шүүмжилж байгаа хүмүүс нөхцөл байдлыг нүдээр хараагүй, ердөө нэг өдөөн хатгагчид хэмээн Эрдоган мэдэгджээ.

Г.Бямбасүрэн