Дэлхийн дунд сургуулиудын сурагчдын “Хятад хэлний гүүр” зургаа дахь удаагийн тэмцээн БНХАУ-д өнгөрсөн сарын 20-оос энэ сарын тавны хооронд  болсон. Тэмцээний тэргүүн байрыг Монгол Улсаа төлөөлөн оролцсон 23 дугаар сургуулийн 11 дүгээр ангийн сурагч Х.Цэрэндолгор эзэлсэн юм. Ингээд түүнтэй ярилцлаа.

5

-“Хятад хэлний гүүр”  тэмцээнд тэргүүн байр эзэлсэнд баяр хүргэе. Энэ тэмцээнд оролцоход ямар  шалгуур тавьдаг вэ?

-Баярлалаа. Энэ тэмцээнд оролцохын тулд эхлээд Монголдоо шалгаруулалтад ордог. Монголд хятад хэл  сурдаг бүх сурагчдын дунд дөрвөн шаттай тэмцээн зохион байгуулдаг. Эхний хоёр шат нь бичгийнх, үлдсэн шат нь нь илтгэх урлаг, асуулт хариулт мөн авъяасаа үзүүлэх байдаг. Тэндээсээ шигшигдээд хамгийн сүүлийн шатанд 23 хүүхдээс нэгдүгээр байранд орсон. Хоёрдугаар байранд нь н.Мөнхбадрал гэж хүүхэд орсон. Бид хоёр улсаа төлөөлж тэмцээнд оролцох эрхтэй болсон. Харин гурав, дөрөвдүгээр байранд орсон хүүхдүүд тэмцээнийг үзэх эрхтэй болсон.

5

-Хятадад болсон тэмцээнд хэдэн орны хүүхдүүд оролцсон бэ?

-Тэмцээнд 63 орны 300 хүүхэд ирсэн. 124 хүүхэд нь тэмцээнд оролцоод үлдсэн нь тэмцээнийг үзсэн. Хувь хүний шалгаруулалтаар би нэгдүгээр байранд, н.Мөнхбадрал хоёрдугаарт орсон. Зургаа дахь жилдээ зохион байгуулагдсан энэ тэмцээнд анх удаа монгол хүүхэд түрүүлсэн.  Тэргүүн  байр нь гурван хүүхэд шалгаруулдаг. АНУ, Бангладеш улсын хүүхдүүд мөн нэгдүгээр байранд орсон. Хоёрдугаар байранд нь зургаан хүүхэд орсон. Тэдний нэг нь н.Мөнхбадрал. Бас багийн тэмцээнд манай баг дэд байрт орсон.

5

-Чиний хувьд тэмцээний шалгаруулалт хэр хүнд санагдсан?

-Өөрөө гоц сайн хичээхгүй бол байр эзэлнэ гэдэг хэцүү гэж багш маань хэлж байсан. Эндээс явахад багш биднийг маш сайн бэлтгэсэн. Бэлтгэж байсан тестүүдээс ирсэн болохоор тийм ч хүнд байгаагүй.

5

-Өөрөө хятад хэлийг хэр хугацаанд судалж байна вэ?

-Гуравдугаар ангиасаа 23-р сургуульд ороод хятад хэлийг судалж байна. Гэхдээ хятад хэлний гүнзгий анги мөртлөө тухайн хэлний хичээлийг 3-4 цагаар заадаггүй. Өдөрт 40 минут л ордог.

Урьд хятад хэлийг сайн судлахгүй, урсгалаараа л явдаг байлаа. Хэл сурахад багшийн үүрэг маш их. Багш яаж зааж байгаагаас их зүйл шалтгаалдаг. Манай хятад багш хичээлээ маш сонирхолтой байдлаар заадаг байсан. Өөрийн эрхгүй хятад хэлэнд татагддаг болсон. Өглөө болгон 6 цагт босоод ханзаа цээжлээд, том болох тусам өөртөө үүрэг өгдөг болсон. Хэрэв сурахыг хүсч байгаа бол хамгийн сайнаар нь сур гэж өөртөө хэлээд сурсан.

5

-Хятад хэл сурахад хүнд шүү дээ. Маш их ханзтай. Түүнийг нэг бүрчлэн цээжлэх болдог. Чи өөртөө хэвшүүлсэн зөвхөн чиний л гэх арга барил байгаа юу?

-Би бичиж байгаа юмаа нүдэндээ сайн тогтоодог. Хятад ханз утгатайгаа их дөхөм, зураг шиг байдаг. Тийм болохоор эргээд сайн санадаг. Нэг харахад тогтоогдчихдог гэсэн үг л дээ.

6

-Танай сургуулийн сурагчдын хятад хэлний  мэдлэгийн түвшин жигд үү, харилцан адилгүй юу?

-Хувь хүнээс л шалтгаална. Бүгдэд л адилхан зааж байгаа. Хичээвэл хэн ч сурна. Зарим хүүхдүүд ээж аавынхаа шахалтаар сурдаг. Тэгж сурч байгаа үед өөрөө сонирхолгүй учраас багш хичнээн сайн заасан ч доогуур түвшинд байдаг. Сайн хүүхдүүд ч их бий.

5

-Энэ тэмцээнд орсноор ямар боломж нээгдсэн бэ?

-Нэгдүгээр байрын шагнал нь Хятад улсад дөрвөн жил сурах тэтгэлэг өгдөг. Тэрэнд нь байр, хоол, сарын тэтгэлэг, сургалтын төлбөр, ирж очих онгоцны тасалбар нь хүртэл багтсан байдаг юм билээ. Сурах сургуулиа өөрөө сонгох боломжтой. Хоёр, гуравдугаар байр нь нэг жилийн тэтгэлэгтэй.

5

-Чиний хувь ямар чиглэлээр сурахаар төлөвлөж байна вэ?

-Хуулийн чиглэлээр суралцах бодолтой байгаа. Манай аав хуульч хүн. Хятад улсад бакалавраа хуулийн чиглэлээр хамгаалаад, магистраа Европын оронд хамгаална гэж бодож байгаа. Монголд хятад хэлтэй хуульч ховор. Тийм болохоор гаднаас маш өндөр үнэ ханштайгаар хуульчдыг  авч ажиллуулдаг. Тийм болохоор ирээдүйтэй.

5

-Үе тэнгийнхэндээ хандаж юу хэлмээр байна вэ?

-Хэлтэй бол хөлтэй гэдэг. Хятад хэл сурдаг гэхээр хятад хүн болчихгүй. Хэл сурна, хэлтэй байна  гэдэг чиний хамгийн том давуу тал болно гэж хэлмээр байна.

5

Ц.Зол