“Samsung Electronics” компанийн гүйцэтгэх захирал Хан Жонг Хи 63 насандаа таалал төгсжээ. Тэрээр мягмар гарагт зүрхний шигдээсээр нас барсан байна. Хан Жонг Хи 2022 оноос хойш “Samsung Electronics”-ийг удирдаж байсан бөгөөд амьдралынхаа 37 жилийг Samsung-д зориулжээ.
АНУ-ын Ерөнхийлөгч Дональд Трампын засаг захиргаа үндэсний аюулгүй байдалтай холбоотой чухал мэдээллээ алдав. Тодруулбал, АНУ-ын үндэсний аюулгүй байдлын алба удахгүй Йеменд цохилт өгөх тухай хэлэлцэж байсан групп чатадаа улс төрийн нөлөө бүхий сэтгүүлч Жеффри Голдбергийг санамсаргүй нэмжээ. “Signal” мессенжер дэх аюулгүй байдлын албаны групп чатад АНУ-ын дэд Ерөнхийлөгч Ж.Д.Вэнс, Батлан хамгаалахын сайд Пит Хегсет, Тагнуулын төв газрын дарга Жон Рэтклифф, Цагаан ордны штабын дарга Сюзи Уайлс зэрэг Д.Трампын засаг захиргааны хэд хэдэн өндөр албан тушаалтан байжээ.
Өчигдөр буюу 2025 оны 3-р сарын 24-нд Саудын Арабын Жидда хотод Украины Ерөнхийлөгч Владимир Зеленский, АНУ-ын төлөөлөгчидтэй уулзалт хийв. Орос-Украины дайныг зогсоох дараагийн шатны арга хэмжээнд шилжих энэ уулзалтад АНУ-ын төрийн нарийн бичгийн дарга Марко Рубио, Орос-Украины асуудал эрхэлсэн тусгай төлөөлөгч Кит Келлог оролцсон байна.
Ираны эрхбаригчид цөмийн хөтөлбөрийн асуудлаар хэлэлцээ хийхэд бэлэн гэв. Тус улсын цөмийн хөтөлбөрийн асуудал сүүлийн жилүүдэд олон улсын анхаарлын төвд байсаар ирсэн бөгөөд НҮБ-ын аюулгүйн зөвлөлийн 5 оронтой байгуулсан цөмийн хөтөлбөрийн гэрээний хугацаа дуусаж байна.
Европын холбооны гол улс орнууд бүс нутгийн аюулгүй байдлыг АНУ-ын шууд оролцоогүйгээр хангах стратегийн шинэ төлөвлөгөө боловсруулж байна. Энэ хүрээнд Европын холбооны батлан хамгаалах чадавхыг бэхжүүлэх, зэвсэгт хүчин, тагнуул, технологийн хамтын ажиллагааг өргөжүүлэх олон улсын хэлэлцээрүүдийг эрчимжүүлэхээр ажиллаж эхэлжээ.
АНУ-ын Ерөнхийлөгч Дональд Трампын засаг захиргаа цагаачлалын бодлогоо улам чангатгат Куба, Хаити, Никарагуа, Венесуэл зэрэг улсаас ирсэн 500 мянга гаруй цагаачийн хууль ёсны оршин суух эрхийг цуцлахаар болжээ. Энэхүү шийдвэр нь түр хугацааны хамгаалалтын статусын хүрээнд гарч буй бөгөөд АНУ-д оршин суух зөвшөөрөлтэй байсан цагаачдад нөлөөлж байна.
Туркийн Ерөнхийлөгч Режеп Тайип Эрдоганы гол өрсөлдөгч гэгдэх Экрем Имамоглу баривчлагдлаа. Экрем Имамоглу бол Истанбул хотын дарга бөгөөд Туркийн Бүгд Найрамдах Ардын Намаас 2028 оны ерөнхийлөгчийн сонгуульд нэр дэвших эрхээ ням гарагт авах байж. Истанбул хотын дарга Экрем Имамоглуг хувьд авлига албан тушаалын хэрэгт буруутгасан бөгөөд түүний баривчилгааны дараа эсэргүүцлийн жагсаал орон даяар өрнөсөн байна.
Өнөөдөр АНУ-ын болоод Украины төлөөлөгчид ОХУ-ын төлөөлөгчидтэй гурван талт уулзалт хийх гэж байна. Уулзалтад оролцох талуудын төлөөлөгчид Саудын Арабт хүрэлцэн ирсэн бөгөөд богино хугацаанд түр гал зогсоох, цаашлаад энхийн гэрээ байгуулах боломжийн талаар хэлэлцэх юм. Дональд Трамп АНУ-ын уламжлалт гадаад бодлогоос ухарч, Орос-Украины дайныг зогсоох арга хэмжээ авч байгаа нь Европын холбоог түгшээж байна.
Украины Одесса хот ОХУ-ын цохилтод өртлөө. Пүрэв гарагт ОХУ-ын нисгэгчгүй онгоцууд Одесса хотод томоохон цохилт өгсөн бөгөөд халдлагын дараа хот тэр чигтээ галд автаад байна. АНУ-ын Ерөнхийлөгч Дональд Трамп Орос-Украины дайныг зогсоох, энхийн гэрээ байгуулах асуудлаар хүчин чармайлт гаргаж буй энэ цаг үед ОХУ-ын талаас ийм хэмжээний цохилт өгч байгаа нь хэлэлцээрийг хойшлуулах магадлалтай
Хойд Солонгосын нийслэл Пхеньян хотод 10 мянган айлын орон сууц ашиглалтад орлоо. Пхеньян хотын Хвасон дүүрэгт сүндэрлэсэн шинэхэн орон сууцны хороололд тус улсын удирдагч Ким Жон Ун зочилсон байна. 2021 онд Ким Жон Ун ядуурлыг бууруулах, амьдралын чанарыг дээшлүүлэх зорилт тавьж таван жилийн төлөвлөгөө баталсан байдаг. Энэ төлөвлөгөөний хүрээнд тус улсын нийслэлд орон сууцны шинэ хорооллүуд сүндэрлэсээр байгаа бөгөөд нийдээ 50 мянган айлын орон сууц цаашид баригдана гэлээ.
Кирсти Ковентри Олон Улсын Олимпийн Хорооны (ОУОХ) 10 дахь Ерөнхийлөгчөөр сонгогдлоо. Тэрээр ОУОХ-ны Ерөнхийлөгчөөр сонгогдож буй анхны африк гаралтай, эмэгтэй болж байна. Өдгөө 41 настай Кирсти Ковентри өмнө нь Зимбабве улсын усан сэлэлтийн шилдэг тамирчдын нэг байсан бөгөөд сүүлийн найман олимпоос долоод нь медаль авчээ.
Боловсролын яам манай боловсролын тогтолцоог нурааж, ирээдүй хойч үеийнхнийг хохироох хүч энэ яамд бий. АНУ-ын Ерөнхийлөгч Дональд Трамп Боловсролын яамыг татан буулгах зарлигт гарын үсэг зурлаа. Энэ бол Дональд Трампын сонгуулийн амлалт байсан бөгөөд АНУ-ын боловсролын яамыг татан буулгахад Конгресс холбогдох хуулийг батлах ёстой.
Ерөнхийлөгч Дональд Трамп Ираны дээд удирдагч Аятолла Али Хаменеид захидал илгээв. Дональд Трампын илгээсэн захидалд, Ираны цөмийн хөтөлбөрийн талаар шинэ хэлэлцээр байгуулах тухай дурджээ
AНУ-ын Холбооны нөөцийн сан эдийн засгийн өсөлтийн төсөөллөө бууруулж бодлогын хүүгээ хэвээр үлдээлээ. Дональд Трампын худалдааны дайн, тарифын өсөлтөөс үүдэн АНУ-ын эдийн засаг агших эрсдэл бий болж, хөрөнгө оруулалтууд зогсож хөрөнгийн зах зээлийн савалгаа үргэлжилж байна
Газын зурваст гал зогсоох хэлэлцээрийн хугацаа дуусаж Израилын довтолгоо дахин эхэллээ. Израил ХАМАС-ын 60 хоногийн хугацаатай гал зогсоох хэлэлцээрийн хугацаа лхагва гарагт дууссан даруйд Израилийн арми Газын зурвасыг агаараас бөмбөгдөж, “хуурай замын ажиллагаа"-г эхлүүллээ. Израилын арми Газын зурвасын төв болон өмнөд хэсэг дэхь аюулгүйн бүсийг өргөтгөж, хойд болон өмнөд хэсгийн хооронд хэсэгчилсэн буфер бүс бий болгохоор ийнхүү хуурай замын ажиллагааг эхлүүлсэн байна
АНУ-ын Ерөнхийлөгч Дональд Трамп Украины Ерөнхийлөгч В.Зеленский нар утсаар ярив. Хоёр улсын удирдагч нар энхийн хэлэлцээр байгуулах асуудлаар ярилцсан бөгөөд “эерэг”, “найрсаг” уур амьсгалтай байсныг BBC агентлаг онцлов. Дональд Трамп, В.Зеленский нар урт хугацаанд гал зогсоох, энхийн гэрээ байгуулах асуудлыг хэлэлцсэн бөгөөд В.Зеленский Запорожье атомын цахилгаан станцыг ОХУ-аас буцааж авах саналтай байна
Путин 30 хоногийн турш Украины эрчим хүчний байгууламжууд руу хийх цохилтоо зогсоохыг зөвшөөрөв
ОХУ болон БНХАУ хиймэл дагуулын туршилтаа нэмэгдүүлж байгааг Пентагон онцоллоо. ОХУ, БНХАУ нь сансрын хиймэл дагуулын хүчин чадлаа сүүлийн саруудад эрчимтэй нэмэгдүүлж “довтолж хамгаалах тактик”-д шилжжээ. Тус улсууд хиймэл дагуулуудынхаа хүчин чадлыг сайжруулж, нэмэгдүүлж байгаа нь сансарт цөмийн зэвсэг байрлуулах амбиц нь хэвээр байгааг илтгэж байна гэж Пентагон мэдээлжээ. Тэр дундаа ОХУ-ын хиймэл дагуулын хөдөлгөөн нэмэгдэж нь сансарт гарч болзошгүй зэвсэгт мөргөлдөөнд идэвхтэй бэлтгэгдэж байна.
АНУ-ын 7 мужийг дайран өнгөрсөн хар салхины улмаас 39 хүн амиа алджээ. Хар салхинд нэрвэгдсэн мужуудаас Миссури мужид хамгийн олон хүн амиа алдсан бол сүйрлийн хэмжээгээр Алабама хамгийн их хохирол амсжээ.
Македонын Кокани дахь Pulse шөнийн клубт гал гарсны улмаас 59 хүн амиа алдлаа. Хэрэг гарсан шөнийн клубт тус улсын DNK хамтлагийн тоглолт болж байсан бөгөөд 500 орчим хүн цугласан байжээ.