2025 оны снукер бильярдын дэлхийн аваргаар 22 настай Жао Шиньтун тодорлоо. Хятадын снукер бильярдын тамирчин Жао Шиньтун дэлхийн аваргын финалд Уэльсийн гурван удаагийн аварга Марк Уильямсыг 18:12 харьцаатай хожиж, дэлхийн аварга болсон анхны хятад тоглогч болсон юм.
АНЭУ Дарфурын бүс нутаг дахь хагас цэрэгжсэн хүчнийг дэмжиж Суданд геноцид үйлдсэн хэргийг Олон улсын шүүх хэрэгсэхгүй болголоо. Судан улс нь АНЭУ-ыг Олон улсын шүүхэд өгсөн бөгөөд Дарфурын бүс нутагт хагас цэрэгжсэн хүчнийг зэвсэгээр хангаж геноцид үйлдэхэд нь дэмжлэг үзүүлсэн гэж буруутгажээ.
АНУ-ын Ерөнхийлөгч Дональд Трамп хууль бусаар оршин сууж буй цагаачдыг албадан гаргах үйл ажиллагаагаа эрчимжүүлсээр байна. Тэрээр цагаачдыг нутаг буцаах хүрээнд АНУ-ыг орхиж эх орондоо буцах хүмүүст мөнгөн урамшуулал олгоно гэдгээ мэдэгдлээ. Тодруулбал эх орондоо буцах сонголт хийж буй бичиг баримтгүй хүмүүст 1000 доллар олгоно гэв.Энэ хөтөлбарт хамрагдан эх орондоо буцах цагаачид ирээдүйд хууль ёсны дагуу АНУ-д нэвтэрч болно гэж Цагаачлалын Зөвлөлийн ахлах ажилтан Аарон Рейхлин-Мелник цахим хуудаснаа онцолжээ.
Их Британичууд ялалтын 80 жилийн ойг албан ёсоор тэмдэглэх гэж байна. “Victory in Europe Day” буюу ялалтын баярын арга хэмжээний хүрээнд Лондон хотын төвд цэргийн жагсаал болж, хаан Их Британийн хаан Чарльз гэр бүлийн хамтаар Букингэмийн ордны тагтан дээрээс ард түмэндээ мэндчилгээ дэвшүүлнэ. Мөн тус улсын агаарын цэргийн “Red Arrows” Лондонгийн тэнгэрт хүндэтгэлийн нислэг хийж баярын уур амьсгал бүрдүүлэх аж.
АНУ-ын нэрт реппер, хөгжмийн бизнесийн магнат Шон “Дидди” Комбсын эсрэг эрүүгийн шүүх хурал албан ёсоор эхэллээ. Түүнийг хар тамхи наймаалах бүлэглэл байгуулсан, бэлгийн мөлжлөг үйлдсэн, биеэ үнэлэлт зохион байгуулсан, бага насны хүүхэд хүчирхийлсэн гэх хэрэгт буруутгаж буй.
АНУ-ын Ерөнхийлөгч Дональд Трампын худалдааны дайн эрчимжиж байна. Тэрээр хилийн чанадад хийгдсэн бүх кинонд 100 хувийн татвар ногдуулахаар болсон нь олон улсын анхаарлыг татлаа. Сүүлийн үеийн Холливүд кинонууд хилийн чанадад зураг авалт ихээр хийгдэж буй нь Америкийн кино урлагийг мөхөлд хүргэж байна гэж Дональд Трамп үзэж байна. Дональд Трамп гадаадын кинонуудад 100 хувийн татвар ногдуулах асуудлаар хийсэн мэдэгдэлдээ, “Киног дахин Америкт хийхийг хүсэж байна” гэж онцолсон бөгөөд уг асуудлыг нэн даруй хэрэгжүүлж эхлэхийг холбогдох агентлагт даалгажээ.
Бямба гарагт Бразилын Рио-де-Жанейро мужийн Копакабана далайн эрэгт Lady Gaga тоглолтоо хийсэн бөгөөд тоглолтын үеэр тэсрэх бөмбөг суурилуулсан байсныг Бразилийн цагдаа нар аюулгүй болгожээ. Уг халдлагыг үйлдэхээр завдсан этгээдүүд гар хийцийн тэсрэх бөмбөг суурилуулсан байсныг Бразилын иргэний цагдаагийн газар, Хууль зүйн яамтай хамтран илрүүлсэн байна. Халдлагыг үйлдэхээр завдсан оролцсон хэд хэдэн сэжигтнүүд байгаа бөгөөд гар хийцийн тэсрэх бөмбөгийг ашиглаж халдлагыг гардан гүйцэтгэхээр төлөвлөж байсан этгээд нь өсвөр насны хүү байжээ.
Ням гарагт ОХУ-ын төрийн мэдлийн телевизээр “Орос, Кремль, Путин 25 жил” нэртэй баримтат кино гарчээ. Уг кинонд Орос-Украины дайны тухай асуудал хөндсөн ярилцагууд болоод Владимир Путины нууцлаг хувийн амьдралын зарим хэсгүүд, тэр дундаа засаглалынх нь он жилүүд багтжээ.
5 дугаар сарын 1 буюу олон улсын хөдөлмөрчдийн өдрөөр Истанбул хотод эсэргүүцлийн жагсаал өрнөсөн. Уг жагсаалыг эрх баригчид хүчээр тарааж, нийт 382 хүнийг баривчилжээ. Цагдаагийн байгууллагаас 50,000 орчим алба хаагчдын хотод тараан байршуулж, Таксимийн талбайд хүрэх бүх замыг хаасан байна.
БНСУ-ын Ерөнхий сайд бөгөөд ерөнхийлөгчийн үүргийг түр орлон гүйцэтгэж буй Хан Док Сү ирэх ерөнхийлөгчийн сонгуульд нэр дэвшихийн тулд албан тушаалаасаа огцрох төлөвтэй байна. Уг мэдээллийг “Yonhap” агентлаг засгийн газрын эх сурвалжаар баталгаажуулсан байна. Тиймээс Хан Док Сү огцрохоо зарлаад байгаа аж.
АНУ-ын Үндэсний аюулгүй байдлын зөвлөх Майк Вальц албан тушаалаасаа чөлөөлөгдлөө. Тэрээр өнгөрсөн сард АНУ-ын тагнуулын мэдээллийг задруулсан асуудлаар албан тушаалаасаа чөлөөлөгдөж байна. Йемен дэх Хуситуудад цохилт өгөх асуудлаар хэлэлцэж байсан АНУ-ын үндэсний аюулгүй байдлын албаны групп чатад санамсаргүй нэмэгдсэн сэтгүүлчийн асуудал дэлхий даяар шуугиан тарьсан байдаг.
АНУ-ын Ерөнхийлөгч Дональд Трампын импортын татвар “Apple” компанид 900 сая долларын алдагдал учруулах төлөвтэй байна. Дональд Трамп БНХАУ-ын бараа бүтээгдэхүүнд 145 хувийн татвар ногдуулсан ч технологийн бараа бүтээгдэхүүнд ногдуулах татварыг чөлөөлөх шийдвэр гаргасан. Гэвч “Apple” компанийн гаргасан тооцоололд нийлүүлэлтийн сүлжээ, хэрэглэглэгчдийн итгэл үнэмшил Хятадын харилцан татвар ногдуулахаар бэлтгэж буй зэрэг асуудлууд “iPhone” утасны борлуулалтад нөлөөлж алдагдал хүлээнэ гэжээ.
АНУ Украинтай ашигт малтмалын салбарт хамтран ажиллах түүхэн гэрээнд гарын үсэг зурсан. Украины ашигт малтмалын тэр дундаа газрын ховор элементийн ордыг ашиглах Дональд Трампын энэ санал АНУ-д ашигтай гэрээ болж байна. Учир нь Дональд Трампын хувьд газрын ховор элементийн салбарт БНХАУ-ын хараат бус байх бодлого хэрэгжүүлэх эхний алхамаа амжилттай хийж байна
АНУ Украин дахь мөргөлдөөнийг шийдвэрлэх 22 нөхцөл танилцуулжээ. Тодруулбал, АНУ-ын төлөөлөгчид Лондонд болсон уулзалтын үеэр Орос- Украины дайныг энхийн замаар шийдвэрлэх зорилгоор 22 нөхцөл бүхий төлөвлөгөөг танилцуулсан байна. Уг төлөвлөгөөний талаар АНУ-ын Ерөнхийлөгч асан Дональд Трампын Украины асуудал хариуцсан тусгай элч Кит Келлог мэдээлжээ.
Казахстан улс гадаадын хөрөнгө оруулагчдад 10 жилийн оршин суух эрх буюу "Алтан виз" олгохоор болжээ. Тус улсын Гадаад хэргийн яамны мэдээлснээр Казахстаны компаниудын дүрмийн сан болон дотоодын үнэт цаасанд 300 мянган ам.доллараас дээш хэмжээний хөрөнгө оруулалт хийсэн гадаадын иргэд 10 жил оршин суух эрхтэй болно гэв.
БНХАУ-д энэ оны байдлаар 3 тэрбум хүнд хангалттай хүрэлцэх хэмжээний хоосон орон сууц байна. Тиймээс БНХАУ-ын хэмжээнд баригдсан байгаа хоосон орон сууцнуудыг тус улсын 1.4 тэрбум гаруй хүн ч дүүргэхгүй гэсэн үг. Энэ оны байдлаар орон сууцны үнэ 2.5 хувь буурна гэж “Reuters” мэдээлжээ.
АНУ Украин “эдийн засгийн түншлэлийн гэрээ” байгуулж, газрын ховор элеметийн салбарт хамтарч ажиллахаар болов. Тодруулбал АНУ Украины газрын ховор элементийн ордыг ашиглах боломжтой болсон бөгөөд гэрээнд зааснаар, АНУ-ын тал 100 хувийн хөрөнгө оруулалт хийж, ордын хувийг талууд тэнцүү эзэмшихээр заажээ. Мөн тус гэрээнд зааснаар ордын нөөц, менежмент, удирдлага Украины мэдэлд байх юм. Украины Ерөнхий сайд Шмигаль уг гэрээг “сэргээн босголтод чиглэсэн стратегийн түншлэл” хэмээн тодорхойлоод байна.
Испани Португалын нутаг дэвсгэрийг бүхэлд нь хамарсан цахилгаан хязгаарлалт иргэдийн амьдралд нөлөөлж эхэлжээ. Даваа гарагаас эхлэн цахилгааны доголдлын улмаас Испани Португалийн иргэд хоол хүнсний нөөцгүй болж байна. Эрчим хүчний хангамж юунаас болж доголдсон нь өнөө хэр тодорхойгүй байгаа бөгөөд Испани Португалын эрх баригчид кибер халдлага байж болзошгүй гэж таамаглаж байна.
Английн Хүүхдийн асуудал эрхэлсэн комиссар Дэм Рейчел хүүхдийн зураг ашиглаж нүцгэлж харуулдаг AI програмуудыг бүрмөсөн хориглохыг засгийн газартаа уриаллаа. Сүүлийн үед хүүхдийн зургуудыг хиймэл оюун ухаанаар засаж, нүцгэлээд видео, контент болгож түгээх гэмт хэрэг ихээр үйлдэгдэх болжээ. Английн Хүүхдийн асуудал эрхэлсэн комиссар Дэм Рейчелийн хэлж байгаагаар “Хүүхдийн бэлгийн хүчирхийллийн агуулгатай зураг, контент, видео бүтээх нь хуулиар хориотой. Гэвч AI технологийн эсрэг шинэ заалтуудыг нэмж тусгах ёстой гэв.
АНУ-ын Ерөнхийлөгч Дональ Трамп Канадын Ерөнхий сайд Марк Карнид баяр хүргэлээ. Тэрээр, Канадын парламентын ээлжит бус сонгуульд намаа удирдаж ялалт байгуулсан Марк Карнитай ойрын үед уулзаж хэлэлцээ хийнэ гэжээ. Уг хэлэлцээний хүрээнд хоёр улсын эдийн засаг, гадаад харилцааны тухай яригдах бөгөөд Марк Карни АНУ-тай хэрхэн харилцах нь олон улсын анхаарлын төвд байна.